ខេត្តកណ្តាល ៖ រថយន្តសាំងយ៉ុង១គ្រឿងដឹកមនុស្សពេញខណៈធ្វើដំណើរត្រឡប់មកពីបុណ្យគេនៅព្រៃវែងវិញ ស្រាប់តែត្រូវរថយន្តបែនដឹកដី...
ខេត្តកណ្តាល ៖ រថយន្តសាំងយ៉ុង១គ្រឿងដឹកមនុស្សពេញខណៈធ្វើដំណើរត្រឡប់មកពីបុណ្យគេនៅព្រៃវែងវិញ ស្រាប់តែត្រូវរថយន្តបែនដឹកដីរេចង្កូតទៅបុកពេញទំហឹងបណ្ដាលឲ្យរងរបួសធ្ងន់-ស្រាល១៧នាក់ ។ ហេតុការណ៍នេះកើតឡើងកាលពីវេលាម៉ោង៣រសៀល ថ្ងៃទី១៨ ខែកុម្ភៈ ឆ្នាំ២០១៧ នៅលើផ្លូវលេខ១១៥ ទល់មុខអនុវិទ្យាល័យ ហ៊ុន សែន ខ្ពបវែង ស្ថិតក្នុងភូមិខ្ពបវែង សង្កាត់កំពង់សំណាញ់ ក្រុងតាខ្មៅ ។
មន្ត្រីនគរបាលចរាចរណ៍ក្រុងតាខ្មៅបានឲ្យដឹងថា គ្រោះថ្នាក់នេះបង្កឡើងដោយរថយន្ត FUSO ពណ៌ក្រហមលាយទឹកប្រាក់ ពាក់ស្លាកលេខ ភ្នំពេញ 3C-2102 អ្នកបើកបរឈ្មោះ ប៊ុន ឆវ័ន្ត ភេទប្រុស អាយុ២០ឆ្នាំ នៅភូមិត្រពាំងជ្រៃ ឃុំព្រៃវិហារ ស្រុកគងពិសី ខេត្តកំពង់ស្ពឺ បើកបរពីលិចទៅកើតក្នុងល្បឿនលឿន លុះដល់ចំណុចកើតហេតុ ខាងលើបានជ្រុលចង្កូតមកឆ្វេងទៅបុករថយន្តសាំងយ៉ុង ពណ៌កណ្តុរល្មែះ ពាក់ស្លាកលេខ ភ្នំពេញ 2AL-5485 បើកបរដោយឈ្មោះ ឈាវ សុភាព ភេទប្រុស អាយុ៤៧ឆ្នាំ នៅភូមិជម្ពូវ័ន្ត សង្កាត់ចោមចៅ ខណ្ឌពោធិ៍សែនសែនជ័យ រាជធានីភ្នំពេញ ដែលបើកបញ្ច្រាសទិសគ្នាចំពីមុខពេញទំហឹង បណ្ដាលឲ្យអ្នកជិះក្នុងរថយន្តសាំងយ៉ុង របួសធ្ងន់ និងស្រាលសរុប១៧នាក់ រីឯអ្នកបើកឡានគៀបជាប់នៅក្នុងរថយន្ដ បណ្តាលឲ្យបាក់ជើងទាំងពីរធ្ងន់ធ្ងរ ។
នគរបាលចរាចរណ៍បញ្ជាក់បន្ថែមថា គ្រោះថ្នាក់ចរាចរណ៍នេះបណ្ដាលឲ្យរងរបួសធ្ងន់៩នាក់ (ស្រី៦នាក់) និងរងរបួសស្រាល៨នាក់ ។ ហើយពេលដែលរថយន្តបុកគ្នានោះ ស្រាប់តែម៉ូតូ១គ្រឿងបើកលឿនបានទៅបុកពីក្រោយរថយន្តសាំងយ៉ុងបន្ថែមទៀត បណ្ដាលឲ្យអ្នកបើកបរម៉ូតូរងរបួសធ្ងន់ម្នាក់ទៀត ។
ក្រោយពេលកើតហេតុ រថយន្តបែនដឹកដី និងអ្នកបើកបរ ត្រូវបានកម្លាំងនគរបាលចរាចរណ៍ក្រុងឃាត់ខ្លួនបញ្ជូនទៅអធិការដ្ឋាននគរបាលដើម្បីចាត់ការតាមនីតិវិធីច្បាប់ រីឯជនរងគ្រោះត្រូវបានសមត្ថកិច្ចបញ្ជូនទៅកាន់មន្ទីរពេទ្យជយ័ជំនះ ក្រុងតាខ្មៅ ដើម្បីធ្វើការព្យាបាល ប៉ុន្តែមិនមានអ្នកស្លាប់ទេ ។
ប្រភពពីជនរងគ្រោះម្នាក់បានឲ្យដឹងថា ពួកគាត់ទាំងអស់គ្នាមានទីលំនៅសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ធ្វើដំណើរត្រឡប់មកពីធ្វើបុណ្យនៅខេត្តព្រៃវែង ៕
COMMENTS