លោក សម រង្ស៊ី បង្ហាញការគាំទ្រដល់ការតស៊ូមតិដោយអហិង្សារបស់សកម្មជនបរិស្ថាន

អតីតប្រធានគណបក្សសង្រ្គោះជាតិ លោក សម រង្ស៊ី ថ្មីៗនេះបានបញ្ជាក់ថា សកម្មជនបរិស្ថាន ប្រមាណជាង២០នាក់ បានជួបជុំគ្នា និងកាន់បដា ដែលមានសរសេរពាក់ព័ន្...

អតីតប្រធានគណបក្សសង្រ្គោះជាតិ លោក សម រង្ស៊ី ថ្មីៗនេះបានបញ្ជាក់ថា សកម្មជនបរិស្ថាន ប្រមាណជាង២០នាក់ បានជួបជុំគ្នា និងកាន់បដា ដែលមានសរសេរពាក់ព័ន្ធនឹងបញ្ហាបរិស្ថាន នៅមុខសាលាឧទ្ធរណ៍ ដើម្បីផ្តល់កម្លាំងចិត្តដល់សកម្មជនបរិស្ថាននៃអង្គការមាតាធម្មជាតិ ចំនួនបីរូប ដែលត្រូវបានសាលាដំបូងខេត្តកោះកុង កាត់ទោសឲ្យជាប់ពន្ធនាគារកន្លងទៅ រួមមានលោក ទ្រី សុវិគា លោក សាន់ ម៉ាឡា និងលោក ស៊ីម សំណាង ខណៈដែលសាលាឧទ្ធរណ៍បើកសវនាការលើបណ្ដឹងសាទុក្ខរបស់ពួកគាត់។ ប៉ុន្តែត្រូវក្រុមសន្តិសុខខណ្ឌដូនពេញរារាំង និងបញ្ឈប់មិនឱ្យកាន់បដា បញ្ចេញមតិឡើយ។

ជាលទ្ធផលសំណុំរឿងក្រុមចលនាមាតាធម្មជាតិទាំងបីរូប ត្រូវសាលាឧទ្ធរណ៍សម្រេចតម្កល់ការសម្រេចរបស់សាលាដំបូងខេត្តកោះកុង ទុកជាបានការ និងទុកមួយខែឲ្យពួកគេប្ដឹងទាស់។ ចំណែកមេធាវីការពារក្តីសកម្មជនទាំងបីរូបដែលកំពុងរស់នៅក្រៅប្រទេស មិនទាន់មានគម្រោងប្ដឹងទាស់ទៅតុលាការកំពូលនៅឡើយទេ។ ក្រុមសកម្មជនការពារបរិស្ថាន នៃអង្គការចលនាមាតាធម្មជាតិ ចាត់ទុកការសម្រេចរបស់សាលាឧទ្ធរណ៍ដែលតម្កល់សាលក្រមរបស់សាលាដំបូងខេត្តកោះកុង នេះថាមិនឈរលើគោលការណ៍ឯករាជ្យ និងយុត្តិធម៌។

ជុំវិញបញ្ហាខាងលើនេះ លោក សម រង្ស៊ី កន្លងមកបានរិះគន់ថា សកម្មជនសិទ្ធិមនុស្ស សកម្មជនដីធ្លី សកម្មជននយោបាយ សកម្មជនបរិសស្ថានជាអាទិ៍ ដែលតស៊ូមតិដោយអហិង្សា និងទាមទារយុត្តិធម៌ដែលមានផលប្រយោជន៍សាធារណៈ តែងតែត្រូវបានអាជ្ញាធរ និងសមត្ថកិច្ចក្រោមការគ្រប់គ្រងរបស់រដ្ឋាភិបាលគណបក្សប្រជាជនកម្ពុជាធ្វើទុក្ខបុកម្នេញ និងផ្តន្ទាទោសយ៉ាងអយុត្តិធម៌ ។ ផ្ទុយទៅវិញឈ្មួញមានអំណាចខិលខូច និងមន្រ្តីពុករលួយដែលគាបសង្កត់ប្រជាពលរដ្ឋក្រីក្រ និងកិបកេងផលប្រយោជន៍សាធារណៈមិនដែលត្រូវបានអាជ្ញាធរមានសមត្ថកិច្ចក្រោមការគ្រប់គ្រងរបស់រដ្ឋាភិបាលផ្ទន្ទាទោសតាមផ្លូវច្បាប់ឡើយ៕